Coconut scam UAE ദുബായ്: യുഎഇയിൽ വ്യാജ ബാങ്ക് ട്രാൻസ്ഫർ രേഖകൾ ഉണ്ടാക്കി മലയാളികൾ ഉൾപ്പെടെയുള്ള വ്യാപാരികളിൽ നിന്ന് ലക്ഷക്കണക്കിന് ദിർഹം വിലമതിക്കുന്ന ഉൽപന്നങ്ങൾ തട്ടിയെടുത്തതായി പരാതി. കൊച്ചി സ്വദേശികളായ അബ്ദുൽ ഗഫൂർ, ഫാഹിം അൽ കാസിമി, ഡോ. ഹുസ്ന ഗഫൂർ, ഫാരിസ് അൽ കാസിമി എന്നിവർ ഡയറക്ടർമാരായ ‘കെ എൻ ട്രേഡിങ്’ എന്ന പ്രമുഖ കയറ്റുമതി-ഇറക്കുമതി സ്ഥാപനമാണ് ഒന്നര കോടി രൂപയുടെ (ആറ് ലക്ഷം ദിർഹം) വഞ്ചനയ്ക്കെതിരെ ദുബായ് പൊലീസിനെ സമീപിച്ചിരിക്കുന്നത്. ദുബായ് ആസ്ഥാനമായി പ്രവർത്തിച്ചിരുന്ന ‘ഈസ്റ്റേൺ ഫാംസ് എൽഎൽസി’ എന്ന കമ്പനിയുടെ ഉടമകളായ ഭാവന ജെയിൻ, നിതിൻ ദിക്ഷിത് (രാജസ്ഥാൻ സ്വദേശികൾ) എന്നിവർക്കെതിരെയാണ് നിയമപോരാട്ടം. തേങ്ങ ഉൾപ്പെടെയുള്ള കാർഷിക ഉൽപന്നങ്ങൾ വിതരണം ചെയ്യുന്നതിനായി 2021 സെപ്റ്റംബറിലാണ് കെ എൻ ട്രേഡിങ് കമ്പനി ഈസ്റ്റേൺ ഫാംസുമായി കരാറിലേർപ്പെടുന്നത്. കരാർ പ്രകാരം ദുബായിലേക്ക് അയച്ചുകൊടുത്ത ലക്ഷക്കണക്കിന് ദിർഹത്തിന്റെ ഉൽപന്നങ്ങൾ കൈപ്പറ്റിയ ശേഷം പ്രതികൾ പണം നൽകാതെ മാസങ്ങളോളം ഒഴിഞ്ഞുമാറി. പണം ബാങ്ക് വഴി അയച്ചിട്ടുണ്ടെന്ന് വിശ്വസിപ്പിക്കാൻ പ്രതികൾ വ്യാജമായി നിർമിച്ച ബാങ്ക് ട്രാൻസ്ഫർ രേഖകൾ വാട്സാപ്പ്, ഇമെയിൽ വഴി അയച്ചുനൽകി. എന്നാൽ അക്കൗണ്ടിൽ പണം എത്തിയിട്ടില്ലെന്ന് കണ്ട് നടത്തിയ പരിശോധനയിലും ബാങ്കിൽ നിന്ന് ലഭിച്ച ഔദ്യോഗിക സ്ഥിരീകരണത്തിലുമാണ് ഇത് വ്യാജരേഖയാണെന്ന് ബോധ്യപ്പെട്ടത്. സാമ്പത്തിക വഞ്ചന വ്യക്തമായതിനെ തുടർന്ന് കെ എൻ ട്രേഡിങ് അധികൃതർ ദുബായ് ചേംബറിനെയും തുടർന്ന് ദുബായ് സിവിൽ കോടതിയെയും സമീപിച്ചു. രേഖകൾ പരിശോധിച്ച കോടതി, പലിശയും കോടതി ചെലവും ഉൾപ്പെടെയുള്ള തുക കെ എൻ ട്രേഡിങ്ങിന് നൽകാൻ ഈസ്റ്റേൺ ഫാംസിനോട് ഉത്തരവിട്ടു. എന്നാൽ ഈ കോടതി വിധി നടപ്പിലാക്കുന്നതിൽ നിന്നും നിയമപരമായ ബാധ്യതകളിൽ നിന്നും രക്ഷപ്പെടാനായി പ്രതികൾ ദുബായിലെ കമ്പനി ധൃതിപിടിച്ച് പൂട്ടുകയും, മറ്റൊരു എമിറേറ്റിൽ പുതിയ പേരിൽ സമാനമായ ബിസിനസ് സ്ഥാപനം ആരംഭിച്ച് തട്ടിപ്പ് തുടരുകയുമാണുണ്ടായത്. കോടതി വിധിയെ അട്ടിമറിക്കാനും നിയമത്തെ വെല്ലുവിളിക്കാനും പ്രതികൾ ബോധപൂർവം നടത്തിയ ഈ നീക്കത്തിനെതിരെ കമ്പനി ഇപ്പോൾ ബർ ദുബായ് പൊലീസ് സ്റ്റേഷനിൽ ക്രിമിനൽ പരാതി നൽകിയിട്ടുണ്ട്. വ്യാജ രേഖ ചമയ്ക്കൽ (Forgery), സാമ്പത്തിക വഞ്ചന, കോടതി വിധിയെ അട്ടിമറിക്കാനുള്ള ശ്രമം എന്നിവ ചൂണ്ടിക്കാട്ടിയാണ് കേസ് ഫയൽ ചെയ്തിരിക്കുന്നത്. പ്രതികൾ തങ്ങളുടെ സ്വന്തം യുട്യൂബ് ചാനൽ ഉപയോഗിച്ച് സമൂഹമാധ്യമങ്ങളിലൂടെ ഇപ്പോഴും തട്ടിപ്പ് തുടരുകയാണെന്ന് കെ എൻ ട്രേഡിങ് ഡയറക്ടർമാർ വാർത്താസമ്മേളനത്തിൽ അറിയിച്ചു. കെ എൻ ട്രേഡിങ്ങിന് പുറമെ ഇന്ത്യയിലെ വിവിധ സംസ്ഥാനങ്ങളിൽ നിന്നുള്ള വിആർ ഇന്റർനാഷണൽ (രാജ്കോട്ട്), ശിവ തുളസി ഗ്ലോബൽ ഇമ്പക്സ് (സത്താര), കർണാട്ടി ഫൂഡ്ടെക് (ഹൈദ്രാബാദ്), രാജ് എക്സ്പോർട്സ് ട്രേഡേഴ്സ് (കോഴിക്കോട്), ഗോതാൽ എക്സിം പ്രൈവറ്റ് ലിമിറ്റഡ് (ഫൽഗാർ) എന്നീ കമ്പനികളെയും ഇവർ വഞ്ചിച്ചിട്ടുണ്ടെന്ന് വാർത്താസമ്മേളനത്തിൽ വ്യക്തമാക്കി. കൂടുതൽ പേർ ഇവരുടെ ചതിക്കുഴിയിൽ വീഴാതിരിക്കാനാണ് ഈ വിവരങ്ങൾ പുറത്തുവിടുന്നതെന്നും പ്രതികൾക്കെതിരെ ശക്തമായ അന്വേഷണം നടത്തി അർഹമായ ശിക്ഷയും നഷ്ടപരിഹാരവും ഉറപ്പാക്കണമെന്നും കമ്പനി അധികൃതർ ആവശ്യപ്പെട്ടു.
| LATEST JOB IN UAE-DAILY UPDATING… | APPLY NOW |
| HOSPITAL JOBS IN UAE-DAILY UPDATING… | APPLY NOW |
| AIRPORT AND AIRLINE JOB IN UAE -DAILY UPDATING… | APPLY NOW |
| TEACHING JOB IN UAE -DAILY UPDATING… | APPLY NOW |
| LOGISTICS JOB IN UAE-DAILY UPDATING… | APPLY NOW |
| ACCOUNTING JOB IN UAE-DAILY UPDATING… | APPLY NOW |
ടിക്കറ്റ് നിരക്ക് റോക്കറ്റ് പോലെ ഉയരുന്നു; നാട്ടിലേക്കുള്ള യാത്ര താൽക്കാലികമായി വേണ്ടെന്നുവെച്ച് പ്രവാസികൾ
Flight Ticket prices skyrocketing അബുദാബി/ദുബായ്: വിമാന ടിക്കറ്റ് നിരക്കിലുണ്ടായ അമിതമായ വർദ്ധനവ് മൂലം നാട്ടിലേക്കുള്ള യാത്രകൾ താൽക്കാലികമായി മാറ്റിവെക്കാൻ പ്രവാസി മലയാളി കുടുംബങ്ങൾ നിർബന്ധിതരാകുന്നു. ബലിപെരുന്നാളിനോടനുബന്ധിച്ച് യുഎഇയിൽ സർക്കാർ ജീവനക്കാർക്ക് ഉൾപ്പെടെ 9 ദിവസത്തെ നീണ്ട അവധി ലഭിച്ചിട്ടും ഉയർന്ന ടിക്കറ്റ് നിരക്ക് കാരണം ഇത്തവണ നാട്ടിലേക്ക് പോയ പ്രവാസികളുടെ എണ്ണം വളരെ കുറവാണ്. അത്യാവശ്യക്കാർ മാത്രമാണ് നിലവിൽ യാത്ര ചെയ്യുന്നത്. സാധാരണയായി മധ്യവേനൽ അവധിക്കാലമായ ജൂലൈ, ഓഗസ്റ്റ് മാസങ്ങളിൽ നാട്ടിലേക്ക് പോകാൻ മാസങ്ങൾക്ക് മുൻപേ ടിക്കറ്റുകൾ ബുക്ക് ചെയ്യാറുണ്ട്. എന്നാൽ ഇത്തവണ ഉയർന്ന നിരക്ക് കാരണം അഡ്വാൻസ് ബുക്കിങ്ങിൽ വൻ കുറവാണ് രേഖപ്പെടുത്തിയിട്ടുള്ളതെന്ന് ട്രാവൽ ഏജൻസികൾ വ്യക്തമാക്കുന്നു. മേഖലയിലെ മുൻകാല സംഘർഷങ്ങളെത്തുടർന്ന് വിദേശ എയർലൈനുകൾ സർവീസുകൾ പുനരാരംഭിച്ചെങ്കിലും, ഇന്ത്യൻ വിമാനക്കമ്പനികൾ പൂർണ്ണതോതിൽ സർവീസ് നടത്താത്തത് നിരക്ക് വർദ്ധനയ്ക്ക് പ്രധാന കാരണമായി. നിലവിൽ യാത്രക്കാരുടെ എണ്ണത്തിന് ആനുപാതികമായ വിമാനങ്ങൾ സർവീസ് നടത്തുന്നില്ല. നാമമാത്രമായി സർവീസ് നടത്തുന്ന ഇന്ത്യൻ കമ്പനികൾ, വിമാനങ്ങൾ അപ്രതീക്ഷിതമായി റദ്ദാക്കുന്നതും സമയക്രമം പാലിക്കാത്തതും യാത്രക്കാരെ കൂടുതൽ വലയ്ക്കുന്നുണ്ട്. ഇന്ധനവില വർദ്ധനവ് കാരണം ഫെബ്രുവരി, മാർച്ച് മാസങ്ങളിൽ തന്നെ നിരക്കുകൾ ഉയർന്ന നിലയിലായിരുന്നു. പെരുന്നാൾ സീസൺ എത്തിയതോടെ ഇത് 45 ശതമാനം വരെ വീണ്ടും വർദ്ധിച്ചു. ഈ നിരക്ക് വർദ്ധനവ് ഓഗസ്റ്റ് മാസം വരെ തുടരാനാണ് സാധ്യത. ദുബായിൽ നിന്ന് കൊച്ചിയിലേക്ക് വൺവേയ്ക്ക് മാത്രം ശരാശരി 2,000 ദിർഹം (ഏകദേശം 51,000 രൂപ) ആണ് നിലവിലെ നിരക്ക്. ഇതനുസരിച്ച് നാലംഗങ്ങളുള്ള ഒരു കുടുംബത്തിന് നാട്ടിലെത്താൻ മാത്രം രണ്ട് ലക്ഷത്തിലധികം രൂപ ടിക്കറ്റ് ഇനത്തിൽ ചെലവാകും. മടക്കയാത്രയ്ക്കും ഇതേ തുക നൽകേണ്ടിവരുമെന്നതിനാൽ കടം വാങ്ങി യാത്ര ചെയ്യേണ്ട അവസ്ഥ ഒഴിവാക്കാൻ പലരും നാട്ടിൽ പോകേണ്ടെന്ന് തീരുമാനിക്കുകയായിരുന്നു. കഷ്ടപ്പെട്ടുണ്ടാക്കുന്ന പണം വിമാനക്കമ്പനികൾക്ക് കൊള്ളലാഭമായി നൽകാൻ മനസ്സില്ലാത്തതുകൊണ്ട് മാത്രമാണ് പലരും യുഎഇയിൽ തന്നെ തുടരുന്നത്. നാട്ടിൽ പോകാൻ കഴിയാത്തതിന്റെ വിഷമം മാറ്റാൻ കുട്ടികളുമായി യുഎഇയിലെ പാർക്കുകളിലും മറ്റ് വിനോദസഞ്ചാര കേന്ദ്രങ്ങളിലും പോകാനാണ് പല കുടുംബനാഥന്മാരുടെയും തീരുമാനം. നിലവിൽ യുഎഇയിലെ ഹോട്ടലുകളിൽ കുറഞ്ഞ നിരക്കിൽ താമസസൗകര്യം ലഭ്യമാണ്. അതിനാൽ വലിയ സാമ്പത്തിക ബാധ്യത വരുത്തിവെക്കാതെ, വാരാന്ത്യങ്ങളിൽ വിവിധ എമിറേറ്റുകളിലെ ഹോട്ടലുകളിൽ താമസിച്ചും കുറഞ്ഞ ചെലവിലുള്ള വിദേശ യാത്രകൾ നടത്തിയും കുടുംബത്തോടൊപ്പം അവധിക്കാലം ആഘോഷമാക്കാനാണ് പല പ്രവാസികളും ഇപ്പോൾ പദ്ധതിയിടുന്നത്.
യുഎഇയിൽ വേനൽച്ചൂട് കടുക്കുന്നു; താപനില ഉയർന്നേക്കും, ജാഗ്രതാ നിർദേശവുമായി അധികൃതർ
Summer heat UAE അബുദാബി: യുഎഇയിൽ വരും ദിവസങ്ങളിൽ വേനൽച്ചൂട് അതീവ ഗുരുതരമാകുമെന്ന് ദേശീയ കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകി. രാജ്യത്തിന്റെ ചില പ്രദേശങ്ങളിൽ താപനില 45 ഡിഗ്രി സെൽഷ്യസ് വരെ ഉയർന്നേക്കും. പെരുന്നാൾ അവധി പ്രമാണിച്ച് ജനങ്ങൾ പാർക്കുകൾ, ബീച്ചുകൾ തുടങ്ങിയ തുറസ്സായ സ്ഥലങ്ങളിലും വിനോദസഞ്ചാര കേന്ദ്രങ്ങളിലും ഒത്തുചേരാൻ സാധ്യതയുള്ളതിനാൽ ആവശ്യമായ മുൻകരുതലുകൾ സ്വീകരിക്കണമെന്ന് അധികൃതർ ഓർമ്മിപ്പിച്ചു. തീരദേശ മേഖലകളിൽ നേരിയ ഈർപ്പമുള്ള (Humidity) കാലാവസ്ഥയായിരിക്കും. അതേസമയം, ഒമാൻ അതിർത്തിയോട് ചേർന്നുള്ള ചില മലയോര മേഖലകളിൽ വേനൽമഴയ്ക്ക് സാധ്യതയുണ്ടെന്നും കാലാവസ്ഥാ കേന്ദ്രം വ്യക്തമാക്കി. നേരിട്ട് വെയിൽ ഏൽക്കുന്നത് കടുത്ത ആരോഗ്യപ്രശ്നങ്ങൾക്ക് കാരണമാകുമെന്ന് ഡോക്ടർമാർ മുന്നറിയിപ്പ് നൽകുന്നു, കടുത്ത വെയിലിൽ ദീർഘനേരം നിൽക്കുന്നത് സൂര്യാഘാതത്തിന് കാരണമായേക്കാം. ശരീരത്തിൽ നിന്ന് അമിതമായി വിയർപ്പ് പുറത്തുപോകുന്നതിലൂടെ ജലത്തിന്റെയും ഉപ്പിന്റെയും അളവ് കുറയുന്നു. കടുത്ത ചൂട് തലച്ചോർ, ഹൃദയം, വൃക്ക എന്നിവയുടെ സ്വാഭാവിക പ്രവർത്തനങ്ങളെപ്പോലും തകരാറിലാക്കാൻ സാധ്യതയുണ്ട്. ചൂടിൽ നിന്ന് സ്വയം രക്ഷനേടാൻ താഴെ പറയുന്ന കാര്യങ്ങൾ ശ്രദ്ധിക്കേണ്ടതാണ്. കടുത്ത ചൂട് അനുഭവപ്പെടുന്ന രാവിലെ 10 മണി മുതൽ വൈകിട്ട് 4 മണി വരെയുള്ള സമയങ്ങളിൽ പാർക്ക്, ബീച്ച്, മരുഭൂമി തുടങ്ങിയ തുറസ്സായ സ്ഥലങ്ങളിൽ പോകുന്നത് പരമാവധി ഒഴിവാക്കുക. ദാഹം തോന്നിയില്ലെങ്കിൽ പോലും ദിവസേന കുറഞ്ഞത് രണ്ടര ലീറ്റർ വെള്ളമെങ്കിലും കുടിക്കുക. വെയിലത്ത് ഇറങ്ങുമ്പോൾ കുട ഉപയോഗിക്കുകയും കൂളിങ് ഗ്ലാസ് ധരിക്കുകയും ചെയ്യുക. ശരീരത്തിന് സുഖപ്രദമായ അയഞ്ഞ പരുത്തി (Cotton) വസ്ത്രങ്ങൾ ധരിക്കുന്നതാണ് ഉത്തമം. പഴങ്ങൾ, പച്ചക്കറികൾ, ധാന്യങ്ങൾ എന്നിവ ഭക്ഷണത്തിൽ ധാരാളമായി ഉൾപ്പെടുത്തുക. ശരീരതാപം ക്രമീകരിക്കുന്നതിനായി ദിവസവും രണ്ടുനേരം കുളിക്കുന്നത് നല്ലതാണ്. കൃത്യമായ വ്യായാമവും ആവശ്യത്തിന് ഉറക്കവും ഉറപ്പുവരുത്തുക.
റൺവേയിൽ വിളക്കുകളിൽ ഇടിച്ചു; കേരളത്തിലേക്കുള്ള വിമാനം ദുരന്തത്തില്നിന്ന് ഒഴിവായത് തലനാരിഴയ്ക്ക്
Air india express Runway Accident ന്യൂഡൽഹി: മസ്കത്തിൽ നിന്ന് കണ്ണൂരിലേക്ക് വരാൻ തയ്യാറെടുക്കുകയായിരുന്ന എയർ ഇന്ത്യ എക്സ്പ്രസ് വിമാനം റൺവേയിൽ വച്ച് വൻ അപകടത്തിൽ നിന്ന് തലനാരിഴയ്ക്ക് രക്ഷപ്പെട്ടു. മെയ് 15-നാണ് ബോയിങ് 737 വിമാനത്തിന് കേടുപാടുകൾ സംഭവിച്ച ഈ അത്ഭുതകരമായ രക്ഷപ്പെടൽ ഉണ്ടായത്. ടേക്ക് ഓഫിനായി വിമാനം മുന്നോട്ട് നീക്കുന്നതിനിടെ പൈലറ്റുമാർക്ക് സംഭവിച്ച ആശയക്കുഴപ്പമാണ് അപകടത്തിന് കാരണമായത്. റൺവേയുടെ വശങ്ങളിലുള്ള വിളക്കുകളെ റൺവേയുടെ മധ്യഭാഗത്തെ ലൈനുകളായി പൈലറ്റുമാർ തെറ്റിദ്ധരിക്കുകയായിരുന്നു. ഇതേത്തുടർന്ന് തെറ്റായ ദിശയിലൂടെ വിമാനം മുന്നോട്ട് എടുത്തപ്പോൾ റൺവേയിലെ വിളക്കുകളിൽ വിമാനം ശക്തമായി ഇടിച്ചു. ഇടിയുടെ ആഘാതത്തിൽ വിമാനത്തിന്റെ ഒരു ടയർ പൂർണ്ണമായി തകർന്നു. കൂടാതെ വിമാനത്തിൽ നിന്ന് ഹൈഡ്രോളിക് ദ്രാവകം ചോരുകയും ചെയ്തു. വിമാനം ഇടിച്ചു കയറിയതിനെത്തുടർന്ന് റൺവേയിലെ ഒട്ടനവധി ലൈറ്റുകൾ തകർന്നിട്ടുണ്ട്. ശക്തമായ ശബ്ദം കേൾക്കുകയും കോക്പിറ്റിൽ അപകട മുന്നറിയിപ്പ് ലഭിക്കുകയും ചെയ്തതോടെ പൈലറ്റുമാർ പെട്ടെന്ന് തന്നെ ടേക്ക് ഓഫ് നടപടികൾ ഉപേക്ഷിക്കുകയായിരുന്നു. അപകടത്തെത്തുടർന്ന് രണ്ട് മണിക്കൂറോളം വിമാനം റൺവേയിൽ തന്നെ കിടന്നു. തുടർന്ന് സുരക്ഷാ മുൻകരുതലുകളുടെ ഭാഗമായി യാത്രക്കാരെ റൺവേയിൽ വച്ച് തന്നെ വിമാനത്തിൽ നിന്നും സുരക്ഷിതമായി പുറത്തിറക്കി. അപകടം നടന്ന് ഒൻപത് ദിവസങ്ങൾ പിന്നിട്ടിട്ടും വിമാനം ഇപ്പോഴും മസ്കത്ത് വിമാനത്താവളത്തിൽ തന്നെയാണുള്ളത്. കടുത്ത സുരക്ഷാവീഴ്ചയായി കണക്കാക്കി സംഭവത്തെക്കുറിച്ച് ഒമാന്റെ വ്യോമയാന അപകട അന്വേഷണ ഏജൻസി വിശദമായ അന്വേഷണം ആരംഭിച്ചിട്ടുണ്ട്.
ഔദ്യോഗിക യൂണിഫോം പുറത്തിറക്കി ഇത്തിഹാദ് റെയിൽ; യാത്രാ സർവീസുകൾ ഉടൻ ആരംഭിക്കും
Etihad Rail staff uniforms അബുദാബി: യുഎഇ കാത്തിരിക്കുന്ന ഏറ്റവും വലിയ ഗതാഗത മുന്നേറ്റങ്ങളിലൊന്നായ ഇത്തിഹാദ് റെയിൽവേ യാത്രാ സർവീസുകൾ ആരംഭിക്കുന്നതിന്റെ ഭാഗമായി തങ്ങളുടെ ഫ്രണ്ട്-ഓഫീസ് ജീവനക്കാരുടെ ഔദ്യോഗിക യൂണിഫോമുകൾ പുറത്തിറക്കി. സുരക്ഷയ്ക്കും സേവന നിലവാരത്തിനും മുൻഗണന നൽകിക്കൊണ്ട് വിവിധ ഘട്ടങ്ങളായാണ് രാജ്യത്തുടനീളം യാത്രാ സർവീസുകൾ വ്യാപിപ്പിക്കാൻ ഇത്തിഹാദ് റെയിൽ ഒരുങ്ങുന്നത്. ട്രെയിനിലെ ഹോസ്റ്റുകൾ, സ്റ്റേഷൻ ജീവനക്കാർ, ഉപഭോക്താക്കളുമായി നേരിട്ട് ഇടപഴകുന്ന മറ്റ് ടീമുകൾ എന്നിവരാണ് ഈ പുതിയ യൂണിഫോം ധരിക്കുക. ഇത്തിഹാദ് റെയിലിന്റെ പുതിയ യൂണിഫോമുകൾ അത്യാധുനികമായ ഗ്രേ (ചാര) നിറവും അതിൽ ആകർഷകമായ ചുവപ്പ് ലൈനുകളും ചേർന്നതാണ്. പ്രൊഫഷണലിസവും എമിറാത്തി ആതിഥേയത്വ മര്യാദകളും പ്രതിഫലിപ്പിക്കുന്നതിനൊപ്പം യുഎഇയിലെ കാലാവസ്ഥയ്ക്ക് അനുയോജ്യമായ രീതിയിൽ സുഖപ്രദമായും ജോലി സുഗമമാക്കുന്ന തരത്തിലുമാണ് ഇത് രൂപകൽപ്പന ചെയ്തിരിക്കുന്നത്. യൂണിഫോമിലെ ഗ്രേ നിറം വിശ്വാസ്യതയെയും ശാന്തതയെയും സൂചിപ്പിക്കുമ്പോൾ, ചുവപ്പ് നിറം ഈ ദേശീയ റെയിൽ പദ്ധതിക്ക് പിന്നിലെ ഊർജ്ജത്തെയും ലക്ഷ്യബോധത്തെയുമാണ് പ്രതിഫലിപ്പിക്കുന്നത്. യാത്രാ സർവീസുകൾ തുടങ്ങുന്നതിന് മുന്നോടിയായി ഈ യൂണിഫോം പുറത്തിറക്കൽ വളരെ സുപ്രധാനമായ ഒരു ഘട്ടമാണെന്ന് ഇത്തിഹാദ് റെയിൽ മൊബിലിറ്റിയുടെ കൊമേഴ്സ്യൽ എക്സിക്യൂട്ടീവ് ഡയറക്ടർ അദ്ര അൽമൻസൂരി പറഞ്ഞു. “ഈ യൂണിഫോമുകൾ ഞങ്ങളുടെ ദൃശ്യപരമായ അടയാളം മാത്രമല്ല, മറിച്ച് വരും വർഷങ്ങളിൽ ആയിരക്കണക്കിന് യാത്രക്കാർക്ക് മുന്നിൽ ഇത്തിഹാദ് റെയിലിന്റെ മുഖമായി മാറാൻ പോകുന്ന ഞങ്ങളുടെ ജീവനക്കാരുടെ പ്രതീകം കൂടിയാണ്. സുരക്ഷ, പ്രൊഫഷണലിസം, ആതിഥേയത്വം, ദേശീയ പാരമ്പര്യം എന്നീ മൂല്യങ്ങൾ മുൻനിർത്തിയാണ് ഓരോ ചെറിയ ഭാഗവും ഡിസൈൻ ചെയ്തിരിക്കുന്നത്.” യുഎഇയിലെ പ്രധാന സ്റ്റേഷനുകൾ കേന്ദ്രീകരിച്ച് ഘട്ടങ്ങളായാണ് യാത്രാ സർവീസുകൾ ആരംഭിക്കുക. ട്രെയിൻ സർവീസ് നടത്തുന്ന റൂട്ടുകൾ, സ്റ്റേഷനുകൾ, യാത്രക്കാർക്കുള്ള മറ്റ് വിവരങ്ങൾ എന്നിവ വരും ആഴ്ചകളിൽ ഇത്തിഹാദ് റെയിൽ ഔദ്യോഗികമായി പുറത്തുവിടുമെന്നാണ് പ്രതീക്ഷിക്കുന്നത്.
വെടിനിർത്തലിനിടെ ഇറാനിൽ യുഎസ് വ്യോമാക്രമണം; മിസൈൽ കേന്ദ്രവും ബോട്ടുകളും തകർത്തു
US airstrikes in Iran വാഷിംഗ്ടൺ/ടെഹ്റാൻ: മേഖലയിൽ താൽക്കാലിക വെടിനിർത്തൽ നിലനിൽക്കുന്നതിനിടെ ദക്ഷിണ ഇറാനിൽ ശക്തമായ ആക്രമണം നടത്തി യുഎസ് സൈന്യം. തന്ത്രപ്രധാനമായ ഹോർമുസ് കടലിടുക്കിൽ മൈനുകൾ സ്ഥാപിക്കാൻ ശ്രമിച്ച ഇറാനിയൻ റെവല്യൂഷണറി ഗാർഡ് കോറിന്റെ ബോട്ടുകളും യുഎസ് യുദ്ധവിമാനങ്ങളെ ലക്ഷ്യമിട്ട ബന്ദർ അബ്ബാസിലെ മിസൈൽ വിക്ഷേപണ കേന്ദ്രവുമാണ് യുഎസ് വ്യോമസേന തകർത്തത്. അമേരിക്കൻ സൈനികർക്കെതിരെയുള്ള ഭീഷണി തടയാനും തങ്ങളുടെ സൈനികരുടെ സുരക്ഷ ഉറപ്പാക്കാനുമാണ് ഈ അടിയന്തിര നീക്കമെന്ന് യുഎസ് സെൻട്രൽ കമാൻഡ് വ്യക്തമാക്കി. ആക്രമണത്തെത്തുടർന്ന് ഇറാന്റെ തീരദേശ നഗരങ്ങളായ ബന്ദർ അബ്ബാസ്, സിറിക്, ജാസ്ക് എന്നിവിടങ്ങളിൽ വലിയ സ്ഫോടനങ്ങൾ ഉണ്ടായതായി ഇറാനിയൻ മാധ്യമങ്ങൾ റിപ്പോർട്ട് ചെയ്തു. ഇറാൻ തങ്ങളുടെ കൈവശമുള്ള സമ്പുഷ്ടീകരിച്ച യുറേനിയം ഒന്നുകിൽ അമേരിക്കയ്ക്ക് കൈമാറണം, അല്ലെങ്കിൽ അന്താരാഷ്ട്ര മേൽനോട്ടത്തിൽ പൂർണ്ണമായി നശിപ്പിക്കണമെന്ന് യുഎസ് പ്രസിഡന്റ് ഡൊണാൾഡ് ട്രംപ് കർശനമായി ആവശ്യപ്പെട്ടതിന് തൊട്ടുപിന്നാലെയാണ് ഈ സൈനിക നടപടി എന്നത് ശ്രദ്ധേയമാണ്. ഈ ആക്രമണം നിലവിലുള്ള വെടിനിർത്തൽ കരാറിന്റെ ലംഘനമോ അതിന്റെ അവസാനമോ അല്ലെന്ന് അമേരിക്കൻ ഉദ്യോഗസ്ഥർ വ്യക്തമാക്കി. ഇതൊരു സ്വാഭാവിക പ്രതിരോധ നടപടി മാത്രമാണ്. നിലവിൽ സ്ഥിതിഗതികൾ ശാന്തമാണ്. ആക്രമണം പരിമിതമായ തോതിൽ മാത്രമുള്ളതാണെന്നും ഇത് വരും ദിവസങ്ങളിൽ തുടരാൻ ഉദ്ദേശിക്കുന്നില്ലെന്നും യുഎസ് അറിയിച്ചിട്ടുണ്ട്. കുറച്ചുകാലമായി ശാന്തമായിരുന്ന പശ്ചിമേഷ്യൻ അന്തരീക്ഷം ഈ സംഭവത്തോടെ വീണ്ടും വഷളാകാനാണ് സാധ്യത. അമേരിക്കൻ ആക്രമണങ്ങളോട് ഇറാൻ ഔദ്യോഗികമായി ഇതുവരെ പ്രതികരിച്ചിട്ടില്ല. എങ്കിലും, മേഖലയിൽ വീണ്ടും ശക്തമായ പ്രത്യാക്രമണങ്ങൾക്ക് ഇറാൻ മുതിരുമോയെന്ന് വരും മണിക്കൂറുകളിൽ മാത്രമേ വ്യക്തമാകൂ.
